МӘЖІЛІС БІРҚАТАР РАТИФИКАЦИЯЛЫҚ ЗАҢ ЖОБАЛАРЫН МАҚҰЛДАДЫ

 Астана. 25-мамыр. Мәжіліс үйі. Бүгін Мәжіліс Спикері Бақтықожа Ізмұхамбетовтің төрағалығымен Палатаның жалпы отырысы өтті. Күн тәртібіндегі сұрақтарға кіріспес бұрын Б. Ізмұхамбетов Мәжіліс депутаты Қабиболла Жақыповқа награда табыс етті. Яғни, Елбасы,  Қазақстан халқы Ассамблеясының Төрағасы  Нұрсұлтан Назарбаев Қазақстан халқы Ассамблеясы Кеңесінің шешімімен ұлттық бірлікті нығайтуға, мәдениетаралық сұхбатты дамытуға және қазақстандық патриотизмді тәрбиелеуге қосқан елеулі үлесі үшін Қабиболла Жақыповты «Қазақстан халқы Ассамблеясының қоғамдық «Бірлік» алтын медалімен» марапаттады.

Одан әрі депутаттық корпус ратификациялық заң жобаларын талқылауға кірісті.

Халық қалаулылары назарына «2014 жылғы 23 желтоқсандағы Еуразиялық экономикалық одақ шеңберінде дәрілік заттар айналысының бірыңғай қағидаттары мен қағидалары туралы келісімге Армения Республикасының қосылуы туралы хаттаманы, сонымен қатар,  медициналық бұйымдар (медициналық мақсаттағы бұйымдар мен медициналық техника) айналысының бірыңғай қағидаттары мен қағидалары туралы келісімге Армения Республикасының қосылуы туралы хаттаманы ратификациялау ұсынылды.

                Екі хаттама да 2015 жылы Мәскеу қаласында жасалған. Аталған заң жобалары бойынша баяндама жасаған Денсаулық сақтау және әлеуметтік даму министрі Тамара Дүйсенованың айтуынша дәрілік заттар айналысының бірыңғай қағидаттары мен қағидалары негізінде дәрілік заттарды тіркеу және сараптау кезінде, әсер етуші заттардың сапалық құрамы әртүрлі болатын дәрілік заттарды бір сауда атауымен тіркеуге, мүше мемлекеттердің бірінде тіркелген дәрілік заттарды басқа мүше мемлекетте қайта тіркеуге тыйым салынады, сондай-ақ, бір мүше мемлекетте жүргізілген клиникаға дейінгі, клиникалық сынақтар және дәрілік заттарды инспекциялау нәтижелері басқа мүше мемлекеттер тарапынан мойындалатын болады.

Сонымен қатар,  дәрілік заттар ортақ нарыққа, олар бірыңғай тәртіпке сәйкес тіркеуден өткенде және дәрілік заттардың бірыңғай тізіліміне енгізілген жағдайда ғана өткізіліп, дәрілік заттарды өндіру тиісті бірыңғай өндірістік практика (GMP) қағидаларына сәйкес жүзеге асырылмақ.

Ал, медициналық бұйымдар, яғни медициналық мақсаттағы бұйымдар мен медициналық техника айналысының бірыңғай қағидаттары мен қағидалары негізінде медициналық бұйымдарды тіркеу барысында Одақ шеңберінде өндірілген және басқа мемлекеттерден әкелінген медициналық бұйымдарға бірдей талаптар қойылады. Мүше елдерде тіркелген медициналық бұйымдар айналысқа шығар алдында міндетті түрде арнайы белгімен  таңбаланады.

Одақ елдерінде адамдардың өміріне және денсаулығына қауіп төндіретін, сапасыз, фальсификатты немесе жалған медициналық бұйымдардың айналыста болуы анықталған жағдайда, уәкілетті орган мүше мемлекеттерге хабардар етеді. Бұл орайда медициналық бұйымдардың қолданылуын тоқтата тұру, оған тыйым салу және айналыстан алу бойынша шаралар қолданылмақ.

Заң жобалары бойынша қосымша баяндама жасаған Мәжіліс депутаты, Халықаралық істер, қорғаныс және қауіпсіздік комитетінің мүшесі Наталья Жұмаділдаева Мәжіліс Комитеттерінің осы Хаттамаларды оң бағалағанын алға тартты.

 (Зәмеш Кеңесқызы – 74-63-02. ҚР Парламенті Мәжілісі Аппаратының Баспасөз қызметі)