МӘЖІЛІС ТӨЛЕМДЕР ЖӘНЕ ТӨЛЕМ ЖҮЙЕЛЕРІ ТУРАЛЫ ЗАҢ ЖОБАСЫН БІРІНШІ ОҚЫЛЫМДА МАҚҰЛДАДЫ

Астана. 1-маусым. Мәжіліс үйі. Бүгін Мәжіліс Спикері Бақтықожа Ізмұхамбетовтің төрағалығымен Палатаның жалпы отырысы өтіп, онда халық қалаулылары  «Төлемдер және төлем жүйелері туралы» және оған леспе заң жобаларын бірінші оқылымда мақұлдады.

Аталған құжат бойынша баяндама жасаған Қазақстан Республикасы Ұлттық Банкінің Төрағасы Данияр Ақышевтың айтуынша заң жобасы арқылы төлемдер мен ақша аударымдары туралы нұсқауды орындау тәртібі мен әдістері ең үздік әлемдік практикаға сәйкес жетілдіріледі, сондай-ақ қазіргі заманғы инновациялық технологияларды пайдалана отырып, төлемге бастама жасаудың жаңа әдістерін пайдалану мүмкіндігі енгізіледі.

Сондай-ақ, мемлекеттік бюджеттен және мемлекеттік әлеуметтік сақтандыру қорынан төленетін жәрдемақылар мен әлеуметтік төлемдердің, тұрғын үй төлемдерінің, азаматтардың нотариус депозитіне аударылатын ақшасының есебінен банк шоты иесінің міндеттемелері бойынша берешекті өндіріп алуға шектеу белгілеу және тыйым салу көзделіп отыр.

Сонымен қатар, «төлем ұйымы» ұғымын енгізу, оларды Ұлттық Банкінде есептік тіркеу режимі, Қазақстанның төлем нарығында өз қызметін жүзеге асыратын жеке банктік емес төлем ұйымдарының қызметіне мемлекеттік бақылау енгізу, төлем агенттері мен қосалқы агенттерді тарту арқылы төлем қызметтерінің белгілі бір түрін көрсету мүмкіндігі қарастырылған.

Заң жобасы қабылданған жағдайда қолданыстағы «Ақша төлемі мен аударымы туралы» Заңның күші жойылады де күтілуде. 

Қосымша баяндамашы Мәжіліс депутаты, Қаржы және бюджет комитетінің мүшесі Дания Еспаева жұмыс тобына 180-нен астам ұсыныс келіп түскенін, олардың мүдделі министрліктер мен ведомстволар, бірқатар үкіметтік емес ұйымдар өкілдерінің қатысуымен жұмыс тобының отырыстарында және Комитеттің кеңейтілген отырысында талқыланғанын, Мәжілістің барлық комитеттерінің оң қорытындыларын бергенін атап өтті.