МӘЖІЛІС ДЕПУТАТТАРЫ САЙЛАУШЫЛАРМЕН КЕЗДЕСУ ҮШІН ӨҢІРЛЕРГЕ АТТАНДЫ

Астана, 1 шілде. Мәжіліс Үйі.

Бүгін Мәжіліс депутаттары сайлаушылармен кездесу үшін өңірлерге аттанды. Барлық үш партия мен Қазақстан Халқы Ассамблеясынан сайланған мәжілісмендер тек облыс пен аудан орталықтарында ғана емес, шағын қалалар мен алыс ауылдарға да шығатын болады.

Халық қалаулылары еңбек ұжымдары мен өндіріс пен әлеуметтік саладағылармен жүздесіп, қоғамдық қабылдау жасайтыны жоспарланған.

Депутаттар бәрінен бұрын Парламенттің алтыншы шақырылымының бірінші сессиясындағы заң шығару жұмысына есеп береді.  «Мәңгілік Ел» патриоттық акті мен «100 нақты қадам» Ұлттық жоспарының жүзеге асырылуы жайында да халыққа айтып береді.

Сонымен қатар депутаттар бюджет қаржысынан іске асырылатын «Нұрлы жол» 2015-2019 жылдарға арналған мемлекеттік бағдарламасының обьектілерінің жағдайын білетін болады.

Мәжіліс депутаттары «Нұр Отан», «Ақжол» ҚДП, ҚХКП және Қазақстан Халқы Ассамблеясынан сайланған.

Алғашқы кездесулер, бүгін, 1 шілдеде Атырау мен Қызылорда облыстарында басталды.

Мәжіліс депутаттарының халықпен жүздесулері 1-шілде мен 26 тамыз аралығында өтетін болады.

(Сәуле Досжанова. Т.74-63-01. Ақпаратты ҚР Парламенті Мәжілісі Аппаратының  Баспасөз қызметі таратты.)