Мәжіліс заң шығару қызметін үздік насихаттаған журналистерге арналған «Парламент сөзі» сыйлығына үміткерлерден өтінім қабылдауды бастайды. Бұл іс-шара 2016 жылдан бастап дәстүрлі түрде ұйымдастырылып келеді. 

Атаулы сыйлыққа Палатаның заң шығарушылық қызметі жайында 2019 жылдың 3 қыркүйегі мен 2020 жылдың 15 маусымы аралығында жазылған және жарық көрген материалдар қабылданады.

Жеңімпаздар Мәжілістің қызметі туралы үздік телевизиялық, мерзімдік баспасөз, ғаламтор мен радиоматериалдар, сонымен бірге, фото және бейне-материалдар бойынша анықталады. Сондай-ақ, Қазақстандағы парламенттік журналистиканың дамуы мен өркендеуіне үлес қосқандар да ескерілетін болады.

Өтінімдер 2020 жылдың 22 маусымына дейін қабылданады.

Өтінімге бұқаралық ақпарат құралының, шығармашылық одақтың, қоғамдық бірлестіктің ресми бланкісіндегі, басшы немесе оны алмастыратын адам қол қойған ілеспе хат, өзін-өзі ұсынған жағдайда – сыйлыққа үміткердің өзі қол қойған ілеспе хатын; сыйлыққа үміткер туралы қысқаша ақпарат (Т.А.Ә.А., лауазымы, байланыс телефондары, пошталық мекенжайын, электрондық поштасы); жарияланған немесе эфирге шыққан күні көрсетілген жарияланымдардың мәтіндері, аудио, бейне-фотоматериалдар не электрондық форматта орналастырылған материалдарға жарамды сілтемелерді қосуларыңды сұраймыз.    

Өтінімдерді Парламент Мәжілісінің сыйлығын беру жөніндегі комиссияның жұмыс органына – Қазақстан Республикасы Парламенті Мәжілісінің Баспасөз қызметіне немесе smimazh@parlam.kz электронды мекенжайына жолдауға болады.

Қосымша ақпаратты Мәжілістің parlam.kz ресми сайтынан немесе (8) (7172) 74-63-01, 74-63-04, 74-63-05, 74-68-44 байланыс телефондары арқылы алуға болады.

Жеңімпаздар Байланыс және ақпарат қызметкерлерінің күні қарсаңында жарияланады. Жеңімпаздар Байланыс және ақпарат қызметкерлерінің күні қарсаңында жарияланады.