Иманды заң керек

02.10.2013 20:58 Айхан ШӘРІП

1 365

Мәжіліс депутаты Бақытбек Смағұл Қазақстанда гомосексуал­дық қатынастарды паш етуді түбірімен тоқтататын заң қабылдауды және ірі қалалардағы олардың клубтарын жабуды ұсынып, Үкімет басшысына ресми сауал жолдады.

Батыс елдерінде – Францияда, Бель­гияда осындай біржынысты некелерді ресми тіркеуге рұқсат етіліп, мұндай қатынастар заңдастырылғаны мәлім. Нәтижесінде осы елдерде «әкем, шешем және мен» деп айтуға тыйым салынды, өйткені енді отбасы деген оларда екі әке не қос шешеден тұра алатын көрінеді. 

– Тәуелсіздік алып, ұлттық мұрамызды жаңғыртып, ертеңге деген стратегиялық көзқа­рас­тарымызды қалыптастырып жат­қан бүгінгі күні «демократиялық құндылықтар», «адам құқығын қорғау» деген желеумен Батыс елдерінің трендтерін жамылған қитұрқы құбылыстар біздің елдеде орын ала бастады, – дейді қалаулы. – Бүгінде Еуропаның бірқатар елдері, оның ішінде өркениеттің орталығы болып саналатын Франция, Нидерланды, Бельгия секілді мемлекеттер гомо­сек­суалдық қатынастарды ресми түрде некелік қатынастар санатына қосып, заңмен бекітті. Ал жан­ұя­лық құндылықтарды мемлекеттің отбасы саясатында бәрінен жоғары қойып, өздерінің ұлттық мен­талитетіне байланысты мұндай қатынастарға тыйым салатын заңдарды Ауғанстан, Малайзия, Индонезия, Өзбекстан елдері қабылдады. Бүгінде Ресей де аталмыш тақырыптағы қатаң заңды қабылдап жатыр. Осыған орай мына мәселелерге назар аударғым келеді.
Оның байламынша, Қа­зақ­станның ұлттық идеологиясын қалыптастырғанда ұлт болашағы отбасыдан тыс қарастырылмау керек. «Отан  –  отбасынан бас­талады» деген. «Енді бір сәтке ойланып көрелік: еліміздегі отбасы институты, осындай гомосексуал­дық қатынастар ашық насихат­талып жатқанда, қандай даму дәрежесінде болмақ? Отбасы институты мұндай сәтте құл­ды­райды. Орталық Азиядағы көне өркениеттердің тоғысқан тұсында орналасқан, Ислам Ынты­мақ­тас­тық ұйымының белсенді мүшесі саналатын Қазақстанда бұл үрдіске жол беру, еліміздің имиджіне  де орасан зиян келтіреді. Екін­шіден, адам санасы түсінбейтін нәрсенің  жетегіндегі  жағдайлар­дың алдын алу біздің еліміздің жаһандық әлемнен төнетін қауіп­терге қарсы ұлттық құнды­лықтар жүйесінен құралған ұлттық бол­мысын қорғауға бағытталған нақты қадамдар болмақ. Бұл тұста «Неке және отбасы туралы» кодексінің 11-бабын тек күшейту ғана емес, сонымен қатар гомо­сексуалдық қатынастарды тү­бірімен тоқта­татын заң жобасын әзірлеп, олар­дың түнгі клубтарын түбегейлі жабу керек» деді депутат.
Бақытбек Смағұл Адам ата мен Һауа ана ұрпағына жат мұндай қатынастарға жол беріп отырған мемлекеттерге қарауды ұсынды. «Көбісі үлкен бір елдің «қол­шатырының» астында тұрған, қорғаныс пен қауіпсіздік мә­селелері қатты алаңдатпайтын аумақтарда орналасқан. Ал біздің ел күні-түні көз ілмейтін стра­тегиялық аймақта орын тепкен. Болашақта гомосексуалды ер­кектер ел шекарасын қалай қорғайды? Қорғаныс жағы қалай қамтамасыз етіледі? Демо­гра­фиялық өсімге олар қандай үлес қосады? Ұрпаққа қандай тәрбие бере алады? Бұл сұрақтарға терең­нен көз жүгірткен абзал. Осы тұс­та, рухани емді ұлттық бол­мысы­мыздан, бабалар мұрасынан ізде­геніміз абзал» дейді Мәжіліс депутаты.
 – Бүгінде істеліп жатқан бүкіл шаралар, қабылданып жатқан заңдар азаматтарымыздың тек әлеуметтік жағын арттыру, олардың бай-қуатты қоғамда өмір сүру талаптарына ғана емес, оларды рухани кеселдерден қорғау арналарына да бағытталуы қажет, – дей келе, Б.Смағұл Премьерден осы ұсыныстарды қарап шығып, алда шаралар қабылдауды өтінді.