Елі батырын ұмытпайды

25.12.2013 Жаңалықтар 0 пікір

Мәжіліс депутаты Бақытбек Смағұл бастаған топ кеше Кеңес Одағының Батыры, даңқты қолбасшы Бауыржан Момышұлының туған күніне орай батырдың Астана көшелері бірінің бойында орын тепкен ескерткішіне гүл шоқтарын қою рәсімін өткізді.

Мәжіліс депутаты Бақытбек Смағұл бастаған топ кеше Кеңес Одағының Батыры, даңқты қолбасшы Бауыржан Момышұлының туған күніне орай батырдың Астана көшелері бірінің бойында орын тепкен ескерткішіне гүл шоқтарын қою рәсімін өткізді.

Елорданың аязды өкпек же­лі бет-қолды қарыса да, келуші­лер қатары аз болған жоқ. Атал­ған іс-шараға депутаттар, Ау­ған соғысының ардагерлері, Ар­да­герлер кеңесінің мүшелері, «Жас Отан» жастар қанатының өкілдері, Олимпия резервінің спортшылары және бұқаралық ақпарат құралдарының өкілдері қатысты.

Ортаға шығып сөз алған Б.Сма­ғұл өз ойын былайша өрбітті: «Мем­лекетіміз үшін де үлкеніміз бен кі­шімізге сана еркіндігін қалып­тастыруда тәуелсіз тұлға керек. Ондай тұлға – Бауыржан Момышұлы. Бүгінгі таңда пат­риотизмнің іргесін қалаған, өмірі өнегелі, артында өшпес мұрасы бар аға буынның үлгісін ұрпаққа дарыта әрі тарата білуіміз керек».

Бұдан кейін сөзді Сайын На­зар­бекұлы алды. «Кезінде дана болған халқымыз өз қасиетінен айырылып бара жатқан уақытта Жаратушы бізге А.Байтұрсынов бастаған зиялы қауымды берді, ойды ұмыттырмау үшін Абайды өмірге алып келді, ерлікті есте қалдыру үшін Баукеңді сыйлады. …Осындай ұлы тұлғалармен мақтана әрі оларды мойындай отырып, қазақ халқының ұлылықпен ұштасқандығы әрдайым есімізде жүруі тиіс», деді Сайын ағамыз ағынан жарылып.

Республикалық ардагерлер ұйымы төрағасының орынбасары, генерал Бекболат Мұқышев та даңқты батыр ескерткішіне гүл шоқтарын қою үшін және ерлік рухына тағзым ету үшін арнайы келіпті. «Кезінде ол кісінің еңбегі бағаланбады. «Алтын кездік қап түбінде жатпайды» демекші, Бауыржан Момышұлының ерлігі мен еңбегін қазіргі таңда әлем танып жатыр. Түсіріліп жатқан кино және басқа да іс-шаралар тарихта қалады. Жастарға деген үлкен өнеге, үлгі», дей келіп, ақсақал жастарға қаратып: «Бауыржан аталарың секілді батыр әрі батыл болыңдар», деген ағалық тілегін жеткізді.

Ал Қазақстан Республикасының Ауғанстан және оқшау соғыстар ардагерлерi одағы төрағасының бiрiншi орынбасары Қайрат Тұл­ғаев өз ойын былайша сабақтады: «Ауған соғысына 22 мың 169 қазақ­стандық қатысты. Оның ішін­де 924-і ерлікпен қаза тау­ып, 18-і хабар-ошарсыз кетті. Жә­не де 1115-і мүгедек болып қал­ды. Сол жігіттердің соғыста көр­сет­кен ерлігінде, қайсарлығы мен қа­һар­мандығында Бауыржан Момыш­ұлының да үлесі бар». Ауғандық ардагер жастарды еліміздің бір­тұтастығы мен бірлігін сақтауға шақыра отырып, ол үшін тек білек күші ғана емес, білім алулары қажеттігіне назар аудартты.

«Жас Отан» жастар қанаты Ас­тана қалалық филиалы төрағасының орынбасары Салтанат Әли: «Алаш ұрпағының жастары бүгінгі таңда Елбасымызды, соның ішінде тәу­елсіздік туын желбіреткен Бауыр­жан сынды ағаларымызды әрқа­шан мақтан тұтады. Және де тәу­елсіздігіміздің мәңгі болуы үшін ерінбей еңбектеніп, білікті де бі­л­імді маман атануымыз керек. Ес­керт­кіштер ескерусіз қалып қойма­сын, қайта жастардың тәр­биесі үшін іс-шараларды өткізіп тұрайық», деген жалынды жолдау­ын жеткізді.

Жиналғандар алдында Ба­қыт­бек Смағұл даңқты батырға арна­ған:

Біз қазақпыз досқа құшақ ашатын,

Біз емеспіз жауды көрсе қашатын.

Бауыржандай батыры бар біртуар,

Қазақстан Республикасы жасасын!

– деген бір шумақ өлеңін жігерлі дауыспен оқып берді.

Бұдан кейін келген қауым ес­керткішке гүл шоқтарын қойып, Бауыржан Момышұлының рухына тағзым етті.

Асқар ТҰРАПБАЙҰЛЫ,

«Егемен Қазақстан».