«Егемен Қазақстан» газеті

№136-138, 17 сәуір 2009 ж.

ТҮЙТКІЛДІ МӘСЕЛЕЛЕР НАЗАРҒА АЛЫНАДЫ

Кеше “Нұр Отан” ХДП Орталық аппа­ратында “Қазақстан Республикасының кейбір заңнамалық актілеріне Сыбайлас жемқор­лықпен және көлеңкелі экономикамен күресті күшейту мәселелері бойынша өзгерістер мен толықтырулар енгізу туралы” ҚР Заңының жобасы талқыланған дөңгелек үстел өтті.

Оған билік партиясы жанындағы Жемқорлықпен күрес жөніндегі республикалық қоғамдық кеңестің мүшелері, Парламент депутаттары, Жоғарғы Сот, Бас прокуратура, Ұлттық қауіп­сіздік комитеті, Ішкі істер, Білім және ғылым, Еңбек және халықты әлеуметтік қорғау, Қаржы, Әділет министр­ліктерінің, сондай-ақ, Мемлекеттік қызмет істері жөніндегі агенттік өкілдері қатысты.

Жиында аталған мәселеге байланысты сөз алған “Нұр Отан” ХДП Партиялық ба­қылау комитетінің төрағасы Боран Рахымбеков  заң жобасының 2008 жылғы 6 қарашада өткен партияның Саяси кеңес отырысында Мем­лекет басшысы Н. Назарбаевтың қоғамның көлеңкелі құбылысына қатысты көтерген мә­селелерінің негізінде әзірленгендігін атап өтті.

Басқосуға қатысқан азаматтардың ай­туын­ша, бұл заң жобасының мақсаты – жем­қор­лықпен және көлеңкелі экономикамен кү­ресті күшейтуге бағытталған заңнамалық жүйе­ні жетілдіру, жемқорлық құқық бұзушылық жа­саған мемлекеттік қызметкерлердің жауап­кершілігін қатаңдату, қаржы саласында орын алатын жем­қорлықтың жолын кесу, жемқор­лықты әшкерелеу және оған қарсы күрес жүйе­сін дамыту.

Жиын барысында Экономикалық қыл­мыс­қа және сыбайлас жемқорлыққа қарсы күрес агенттігі төрағасының орынбасары Андрей Лукин, Парламент Мәжілісінің депутаты Мұ­рат Әбенов, т.б. күн тәртібіндегі мәселе бой­ынша ойларын ортаға салды.

Дөңгелек үстелде күн тәртібіне қойылған тағы бір мәселе – ол Парламент қабыр­ға­сында жатқан заң жобасында қаржы полиция­сы органдарына елдегі бұқаралық ақпарат құралдарын жемқорлықпен күресудің құралы ретінде пайдалану мәселесі. Сонымен қатар, басқосуда шенеуніктерді өздеріне мәлім болған жемқорлық сипатқа ие үдерістер туралы құ­зырлы органдарға хабарлап отыруға мәжбүрлеу мәселесі де жаңа заң жобасында қарас­ты­рылғандығы айтылды.

Ләйла ЕДІЛҚЫЗЫ