«Алаш Айнасы»

http://alashainasy.kz/politics/45386/

28.08.2013 ж.

Мәжіліс депутаты шығыста 42 кездесу өткізді

Қазақстан Республикасы Парламенті Мәжілісінің депутаты, «Нұр Отан» партиясы парламенттік фракциясының мүшесі Нұртай Сабильянов 2013 жылғы шілде-тамыз айларында Шығыс Қазақ­стан облысының 31 елді мекенінде сайлаушылармен, жастармен, дәрігерлермен, ауыл тұрғындарымен 42 кездесу өткізді. 

Бұл кездесулер Жарма ауданының Қалбатау, Қызыл ағаш, Жарма, Аршалы ауыл­дары мен Аягөз ауданының Ақщәулі, Мың­бұлақ, Шыңқожа, Тарлаулы, Қопа, Ақтоғай, Ақшатау, Қарағаш ауылдары мен Аягөз қаласында, Үржар ауданының Алтын­­шоқы, Жаңа тілек, Лайбұлақ, Қа­ратұма, Көлденең, Көкөзек, Қабанбай ауыл­дарында, Ұлан ауданының Қ.Қайсен­ов атындағы кентінде, Шығыс ауылында, Зайсан ауданының Біржан ауылы мен Зайсан қаласында, Абай ауданының Сар­жал ауылында, Абыралы өңірінің Қайнар және Танат ауылдарында, Өскемен және Се­мей қалаларында өтті. 

Нұртай Сабильянов сайлаушыларға Ел­ба­сының «Қазақстан-2050» стратегиясы: қалыптасқан мемлекеттің жаңа саяси бағыты» атты Қазақстан халқына Жолдауы, «Нұр Отан» партиясының ағымдағы жұмы­сы және Парламент Мәжілісі тарапынан мақұлданған негізгі заң жобалары туралы арнайы тоқталып, айтып берді. Сонымен қатар, қазіргі уақытта жүзеге асырылып жатқан зейнетақы реформасы, жергілікті өзін-өзі басқару саласындағы негізгі өзгеріс­тер, мемлекеттік қызметтер көрсету туралы түсіндіріп берді.

Кездесулер барысында сайлаушылар жолдарды жөндеу, таза ауызсу, тұрғын үймен қамтамасыз ету, жеңілдетілген несие алу, әлеуметтік көмек, жедел жәрдем, ауыл шаруашылығы өнімдерін өндіру, жүн-тері жинау мен өңдеу, мал ауруы, мәдениет, жастар, білім объектілерін салу, Аягөз-Ақтоғай арасына қатынайтын поездарға қосымша вагондар тіркеу, Семей ядролық сынақ полигонында зардап шеккен азамат­тарды әлеуметтік қорғауды жетілдіру, Ақтоғай стансысында Халық банкінің бөлім­шесін ашу, Қалбатау-Бірлік автожо­лын қайта салу, Аягөз-Үржар арасына қатынайтын ауданаралық рейс ашу, Ұлан ауданының Қ.Қайсенов атындағы кентінде жылу қазандығын салу, Зайсан ауданының елді мекендеріне газ құбырын тарту, оның бағасын реттеу, қауіпсіз қамтамасыз етілуін қадағалау, жемқорлыққа қарсы күресті күшейту, Зайсан қаласының әуежайын күрделі жөндеу, Зайсан мен Алматы қалалары арасында тұрақты әуе рейсін ашу, шекара маңын дамытуды қолға алу, Семей-Қайнар республикалық авто жолын күрделі жөндеу, шағын ауылдарды теле­фон байланысымен, электр жарығымен және пошта қызметімен қамтамасыз ету және т.б. бірқатар мәселелерді көтерді. 

Мәжіліс депутаты Аягөз қаласында салынып жатқан екі балабақшаның, бір мектептің, су жүйесінің құрылыс барысы­мен, Үржар ауданы Айтбай, Жанай және Қа­бан­бай ауылдарында мектеп құрылысы­мен, Зайсан қаласында салынып жатқан мектеп, балабақша құрылыстарымен, Абай ауданының Саржал ауылында жаңа­дан салынып жатқан мектеп құрылысымен танысып, онда құрылыс объектілерін уақ­тылы аяқтау, бюджеттен бөлінген қара­жат­тың мақсатына сай жұмсалуын бақылау, мер­дігерлердің жұмысын қадағалау тура­лы айтылды. Сонымен қатар Зайсан қала­сын­да Халық қаһарманы, Желтоқсан батыры Қайрат Рысқұлбековке арналған ескерткішке барып тағзым етті. «Нұр Отан» партиясының Үржар аудандық филиалы­ның конференциясына қатысып, сөз сөй­леді. Ол партияның халықпен тығыз байла­ныста болуға атсалысуы керектігін, партия жұмысының ашықтығын қамтамасыз ету­дің маңыздылығын, сол арқылы халықтың билікке деген көзқарасы қалыптасатынын атап өтті. 

Сондай-ақ депутат Өскемен қаласына қарайтын Шығыс ауылына барды. Онда оралмандарға арнап салынған 290 үйдің сапасыз салынғаны, оларды қыста жылыту­дың қиындығы, үйлердің суық болатын­дығы туралы мәселе көтерілді. 

Зайсан және Үржар аудандарындағы кездесулерде шекара маңында орналасқан елді мекендерді дамытудың ерекше маңыздылығы атап өтілді. Бұл орайда Н.Сабильянов Елбасының «Қазақ­стан-2050» стратегиясында Үкіметке облыс­­тардың әкімдерімен бірлесіп, 2013 жылы шекара­мен шектес аудандарды да­мыту жөнінде қосымша шаралар кешенін әзірлеу қажет­тілігі тапсырылғанын және оның ағымдағы жылдың қараша айында болатынын атап өтті. 

Семей қаласында Мәжіліс депутаты №8 балалар үйінде болып, тәрбиеленіп жатқан балалардың тұрмыс жағдайымен танысты, тәрбиешілермен және балалар­мен кездесті. Кездесуде ол «Қазақстан Рес­пуб­ликасының кейбір заңнамалық акті­лері­не жетім балалар мен ата-анасының қамқорлығынсыз қалған балалардың тұрғын үйге құқықтарын қамтамасыз ету мәселелері бойынша өзгерістер мен толықтырулар енгізу туралы» заң жобасы қабылданғанын атап өтті. Бұл заң ата-ана қамқорлығынсыз қалған балалар мен жетім балалардың тұрғын үй-жайларына жергілікті атқарушы органдардың тарапы­нан тиімді бақылауды ұлғайтуға, сонымен қатар осы санаттағы балалардың тұрғын үй-жайларға құқықтарын нығайту және салық­тың жеке түрлерін төлеуден босату­мен қоса салықтық жеңілдіктер енгізуге бағытталғанын айтып берді. Жетім балалар мен ата-анасының қамқорлығын­сыз қал­ған балаларды тұрғын үйге есепке қоюдың бірыңғай тәртібі айқындалып, оларға тұрғын үй алуға басымдық құқық берілетіні заңнамалық тұрғыда бекітілгенін жеткізді. Балалардың құқықтарын қорғаудың заң­на­малық тетіктерінің жетілдірілгенін де атап өтті. 

Абыралы өңірінің тұрғындарымен болған кездесуде сайлаушылар Абыралы өңірін дамыту туралы бағдарлама қабыл­данса деген ұсыныс білдірді. 

Нұртай Сабильяновтың Шығыс Қазақ­стан облысындағы барлық кездесу­лері ашық түрде өтті, сайлаушылардың сұ­рақ­тарына жауаптар берілді. Азаматтар өз өтініштері бойынша депутаттың жеке қабылдауында болды. 

Шілде-тамыз 2013 ж.