Негізгі бет  >  Таразы  >  Саясат  >  Енді жастар жиыны мемлекеттік тілде өткізіледі

Енді жастар жиыны мемлекеттік тілде өткізіледі

02.07.2013 22:20 Айхан ШӘРІП

0 209

Бұдан былай жастар көп қатыстырылатын ірі іс-шаралардың, сән-салтанаттардың «мемлекеттік тілде өткізілуіне» мемлекеттің өзі мән беретін болады!
Кеше Мәжілісте өткен «Біз өз Отанымыздың болашағы үшін жауаптымыз» атты дөңгелек үстелде Білім және ғылым министрлігінің басшылығы осындай шешім қабылданғандығын мәлімдеді. Осы жиында «Халық қаһарманы» Бақытжан Ертаев тәуелсіз Қазақстанның әскери мектептерінде әлі күнге сабақтардың орыс тілінде өткізілетіндігін сынға алды. Ал «ауғандық» жауынгерлер Қорғаныс министрлігінің Бас штабында қаржыгерлер қаптап кеткендігін айтып, дабыл қақты. «Халық қаһарманы», Мәжіліс де­путаты Бақытжан Ертаев Білім және ғылым министрлігін әскери білім ор­даларындағы патриоттық тәрбие жұ­мыстарын бетімен жібергендігі үшін сынады.

 – Министрлік шет қалып қалды, – деді қалаулы, – тәрбие жұмыстарына мықты мән беру керек еді. Біздің әс­кери жоғары оқу орындарында әлі күн­ге орыс тілінде сабақ берілуде! Бұл – бір. Екіншіден, Алматыдағы Бауыр­жан Момышұлы атындағы мектепті басқарған адам біздің Ауған соғысы­ның ардагері еді, сондықтан біз қол­дап жүрдік. Бірақ ол Ресейдің генералы­ның формасын киіп алып жүрді. Кімнің оған ресейлік генерал атағын бергенін мен білмеймін. Бірақ ол жастарға қан­дай тәрбие бермек? Біздің болашақ ұрпақ қалай қарайды? Бауыржан баба­мыздың аруағы қолдайтын іс пе бұл? – деп, ашына сөйлеген Б.Ертаев осы­ған өзінің «қапалы болғандығын» айтты.

Рас, білуімізше, осыдан екі айдай бұрын БҒМ-ның конкурстық комиссия­сының шешімімен, полковник-десант­шы, Ауған соғысының ардагері С.Қа­зақпаев қызметiнен алынып, оның ор­нына Бауыржан Момышұлы атын­дағы Алматы республикалық әскери мектеп-интернаттың бастығы қызметі­не Б.Жүсіпов тағайындалыпты. «Бұл жігітке менің қарсылығым жоқ. Бірақ армияда бір күн қызмет етпепті, сарбаз болған адам емес! Ол қалай тәрбие бе­ре­ді балаларға? Осының барлығы ар­қа­ға қамшымен ұрғандай болып жатыр» деп қынжылды Бақытжан Ертаев.

 – Бақытжан ағамыз көтеріп отырған мәсе­ле тек Қазақпаевта ғана емес, – деді жиынға төрағалық еткен Мәжіліс депутаты Бақытбек Смағұл. – Бауыржандай батырдың ұрпақ­тарын қалыптастыратын мектептің бүгінгі таң­да әскерге бармаған азаматтың қолына берілуі – мәселе. Егер Білім және ғылым министрлігі бұл мектептің шаруасын игере алмайтын болса, онда оны Қорғаныс саласы­на қайта беру керек! Олай мазақ қылуға бол­майды.

Б.Смағұл Білім және ғылым министрінен осы мәселеге «ерекше назар аударуды» сұра­ды: «Өйткені Шымкент қаласында да сол мек­теп әскерде болмаған азаматтардың жетек­ші­лігінде жүр. Мен сіздің министрліктің атына хат жазғанмын. Біз енді Ауған соғысы арда­гер­лерімен бірігіп, Бас прокуратураға хат дайын­дап отырмыз. Онда Алматыдағы мектепте жіберілген он шақты кемшіліктер негіздеп көр­сетілген. Тексеруді талап етеді! Себебі көптеген тәрбиеленушілер паркке барып, төбелесіп, қазір қылмыстық іс қозғалуда» деген Мәжіліс депутаты ол балаларға лайықты басшы жетекшілік етіп, лайықты тәрбие беруі керектігін нықтады.

 – Біз барлығын тексерткіземіз, – деп уәде берді Білім және ғылым министрінің орын­басары Мұрат Әбенов. – Балалар төбелеседі деп, заңбұзушылықтар туралы айтылды. Біз құқық қорғау органдарымен бірге арнайы тексеруге дайынбыз! Ол жақта кемшіліктер болса, орнына келтіреміз.
Ал Қарағанды облысының «Ауғанстан­­-дағы соғыс ардагерлері мен мүгедектерінің одағы» кеңесінің төрағасы Амангелді Жан­тасов әскери тәрбие тақырыбын дамытты: «Патриоттық тәрбие дейміз, мен сіздерге айтайын: Қорғаныс министрлігінде, Бас штабта идеологиялық-тәрбие жұмыстары департаменті бар, соның бастығы кім деп ойлайсыздар?» деген Амангелді Теміржанұлы жауабын өзі берді: «Ол – әскери құрылыс­шы! Бұл салада әскери академия бітірген 10-15 жігіт бар, олардың барлығы қазір әскерден кетуде. Оның орнына жаңағыдай, құры­лыс­шылар, ауыл шаруашылығы қызметкерлері әскерде идеология жұмыстарын жүргізуде. Мына жиынға Қорғаныс министрлігінен өкілдер қатысып отыр. Осы жағынан Парла­мент министрлік алдында сұрақ қоюы керек: неге ондайға жол берілуде? Ол біреуге жақсы болар, туыс болар. Бірақ ана жұмысты жүргізе алмайды» деп шарт түйді қоғамдық ұйым басшысы.

Амангелді Жантасов отансүйгіштікке тәрбиелеу жұмыстарын «шабуылды және үздіксіз түрде» жүргізуді ұсынды: «Мысалы, оқу саласында өткізіліп жатқан патриоттық тәрбиеге арналған шараларға талдау жасасақ, олар негізінен мемлекеттік мерекелерге, атау­лы даталарға арналған. Және өте көлемді түр­де өткізуге бейімделген! Оның нәтижесінде пәленбай жүз немесе мың адам қатысты деп баяндайды. Бірақ жылына үш-төрт рет жүз­деген жасөспірімді бір жерге жиып, «Қазақ­стан – керемет ел! Отаныңды сүйіңдер!» деп 40-50 минут жарапазан айтқанымызбен, жас­тар патриот болып шыға келмейді».

Бұл пікірмен БҒМ келісті: «Дұрыс айты­лып кетті, – деді вице-министр Мұрат Әбенов, – жастарды тәрбиелеудің жүйесін, тілін табуымыз керек. Әйтпесе, жиналып алып, құр айтып қана қою, жастарды ара-тұра өтетін шараға шақырумен шектелу, олардың көтерген әңгімесін тыңдап, «жақсы-жақсы» деп, қолдарына бір шоқ гүл ұстатып, жібере салу тиімділікке жатпайды! Мен бұған толық қосыламын!» М.Әбенов Мәжіліс депутаттығынан ми­нистрлікке ауыса сала, осы салаға үңілгенін айтты. «Шынында, шаралар көбейіп кетті. Адамдардың барлығын бір жерге жинаймыз, кіші-үлкен туларды жалаулатамыз, ұран айтамыз да, тарап кетеміз. Сосын көп жерде сценарий бірдей. Айтылатын сөз де бір, жина­латын адамдар да бір. Біз келе сала, Елба­сы­ның Жолдауына қатысты ондай барлық ша­раларды тоқтаттық» деген М.Әбенов ондай іс-шараларға патриотизм, мемлекеттік тіл және ұлттық құндылықтар өзек болуға тиістігін нықтады.

 – Патриоттық іс-шаралардың барлығын біз конкурс арқылы өткізуге міндеттіміз, – деді Мұрат Абдуламитұлы. – Қазір әртүрлі ұйымдар көп. Біз талдау жүргізіп көрдік. Шы­нында, тек қана сондай тендерде мол қаржы ұтып алу үшін жүрген ұйымдар бар. Сол үшін құрылған. Ол ұйым туралы ешкім білмейді. Бірақ ол ұйымдар құжатын қалай ұйымдас­тыру, қалай қатысу, қалай өтінімді толтыруды біледі, қағазын жақсы құрады, ұтады. Алайда шын мәнінде ондай шараны өткізбейді. Біз қазір Елбасы тапсырмасы бойынша өткізі­летін іс-шаралар қатарын екі есеге азайттық және ұйымдарға талап қойдық.
Сосын, вице-министр «көп ұйым басшы­ларының мемлекеттік тілді білмейтіндігін» ал­ға тартты: «Олар ұйымдастыратын шаралар­дың көбісі мемлекеттік тілде өтпейді. Бұған да біздің көңіліміз толмайды. Қазір басқаратын азаматтарға айтып отырмыз: «енді біздің шаралардың басым көпшілігі міндетті түрде мемлекеттік тілде өтуі керек!» Бұған мектеп­терде өтетін шаралардың барлығы да кіреді!» деп мәлім етті М.Әбенов.

Айтқандай, Қазақстанда «Қазақстандық патриотизм» Тұжырымдамасы әзірленетін­-дігі кеше белгілі болды. Оған «Қазақстан–2050» стратегиясы негіз болатын көрінеді. Бұл ретте күзде арнайы конференция өткізілмек. Оның күн тәртібіне құжат жобасы талқылауға шығарылады деп күтілуде.
Жиында Дін істері агенттігінің төрағасы Қай­рат Лама Шариф 5 қыркүйекте Петро­павлда «Дін және патриотизм» атты жиын өтетіндігін еске салды.

 – Елбасының «Қазақстан–2050» стра­тегиясы: қалыптасқан мемлекеттің жаңа саяси бағыты» атты Жолдауына сәйкес, экстремизмге қарсы, оның алдын алу бойынша іс-шаралар туралы мемлекеттік бағдарлама жасалуда. Бұл 2017 жылға дейінгі үлкен бағдарлама болмақ. Оған барлық әкімдіктер, барлық құзырлы құрылымдар атсалысады, – деген Дін істері агенттігінің басшысы қоғамдық ұйымдарды бірлескен жұмысқа шақырды: «Қатысыңыздар! 200 миллиард теңгеге жуық қаржы бөлінеді. Оның барлығын конкурстар арқылы жеңіп алыңыздар!». Экстремизмге қарсы бағдарлама аясындағы бірлескен іс-қимылдың бір саласы ретінде Қайрат Лама Шариф «барлық түрмелерде жұмыс жасауды» ұсынды: «Өйткені түрмелер­де­гілер, әсіресе, Жезқазғанда 300-«терроризм» бабымен сотталып отырған жастар алдында бір жағынан жұма күндері имамдар сөйлейді, екінші жағынан, сіздер сияқты қан кешкен соғыс ардагерлері, аға ұрпақ өкілдері әңгіме­лесіп, үлгілеріңізді таратсаңыздар. Біздің қо­ғамымызға сіздердің осы күштеріңіз қажет болып отыр» деген Агенттік төрағасы қыр­күйекте, Петропавлдағы жиынға осы бағыт­тағы нақты жобаларды алып келуді ұсынды. «Талқылап, іске асырайық!» деді ол.