Дамуымыздың ертеңін айқындады

Барыс бейнелі болашаққа баянды бағыт ұстаған тәуелсіз Қазақстан жаңа тарихында өзінің әлеуметтік-экономикалық дамуының жаңа сапалық кезеңіне өтті. Оның шынайы дәйектемесі Елбасы Нұрсұлтан Назарбаевтың Қазақстан халқына арнаған кезекті Жолдауынан нақты көрініс тапты. Қалыптасқан мемлекеттің жаңаша дамуына бастаған «Қазақстан-2050» Стратегиясын жүзеге асырудың қазіргі және ұзақмерзімдік нақты жоспарын айқындаған бұл тарихи Жолдаудың басты идеясы – Қазақстанның болашағына деген нық сенім. Елбасының осы кезекті Жолдауы жарияланғаннан кейін алғашқы әсерлерімен бөлісу мақсатында Парламент Сенатының депутаты Светлана Жалмағамбетованы әңгімеге тартқан едік.

– Светлана Жақияқызы, қасиетті жұма күні Тәуелсіздік сарайында тағы бір тарихи құжат – Елбасының Қазақ­­­­стан халқына арнаған кезек­ті Жолдауы жария етіл­ді. Осыған байланыс­ты алғашқы әсерлеріңізбен бөлі­сіп, биыл­­ғы Жолдаудың негізгі басым­дықтарын атап өтсеңіз.

– Әлмисақтан әмбеге аян ақиқат – ел дамуының басты тұғыры – экономика. Мемлекет басшысының Қазақстан халқына арнаған биылғы Жолдауы «Қазақстан-2050» Стратегиясын нақты жүзеге асырудың барлық салалардағы таяу мерзімдегі және ұзақмерзімдік міндеттері мен мақсаттарын айқындаған стратегиялық құжат болып табылады. Елбасы өзінің Жолдауында «Күшті, қуатты мемлекеттер ғана ұзақмерзімдік жоспарлаумен, тұрақты экономикалық өсумен айналысады. «Қазақстан-2050» Стратегиясы – барлық саланы қамтитын және үздіксіз өсуді қамтамасыз ететін жаңғыру жолы... Стратегияны мүлтіксіз орын­дап, емтиханнан мүдірмей өту – ортақ парыз, абыройлы міндет!» деп атап көрсетті.

Мемлекет басшысы ха­лық на­зарына ұсынған осы бір стра­тегиялық бағдар­­­ла­ма­сында еліміздің 2050 жыл­ға дейін­гі экономикалық-әлеу­меттік да­му ке­зеңдерін жеті бес­жыл­­дыққа бөліп, кезең-кезеңмен атқарылатын ке­шенді міндеттерді саралады. Бұл жеті бесжылдықтың әрқайсысы еліміздің әлемдегі ең дамыған 30 мемлекетінің құрамына кіру жөніндегі биік мақсатқа жету жолындағы ортақ міндетті ойдағыдай іс-жүзіне асыру белестері болмақ. Қазір елімізді дамытудың үдеме­лі ин­дустриялық-инновация­­лық­ бағ­­дарламасының алғаш­қы бес­жылдығының қорытын­ды жылында тұрмыз. Бірінші бесжылдықта атқарылған шаралар ауқымы үлкен. Мемлекет басшысы биылғы Жолдауында келесі – екінші және одан кейінгі бесжылдықтарда атқа­рылатын нақты міндеттер ауқы­мын айқындады. Бұл бесжыл­дықтарда мо­­­­биль­ді, мульти­медиялық, нано және ғарыштық технологиялар, роботты техника, гендік инжинерия салаларын, болашақтың энергиясын іздеу мен ашудың негізін салуға ерекше мән берілмек.

– Жолдауда қазақ­стан­дық­тардың тұрмыс жағ­да­й­ын жақсартып, өмір сүру дә­ре­жесін арттыру мәсе­ле­ле­ріне ерекше мән берілді. Осы орай­дағы пікі­рі­ңіз қан­дай?

– Елбасы барлық жолдау­­ларында халықтың өмір сапасын арттыруды бірінші кезекке қояды. Кейбір ретте ел арасында осы ұзақмерзімдік бағдарламалар қабылдаудан гөрі елдің бүгінгі тұрмыс жағдайын жақсартатын мә­селелерді күн тәртібіне қойса дұрыс болар еді деген пікірлер де айтылып қалады. Ақиқатына келсек, «Қазақстан-2030», «Қа­зақстан-2050» Стратегиялық бағдарламаларының негізгі мақсаты да халқымыздың тұрмыс жағдайын жақсартып, өмір сүру сапасын арттыру болып табылады. Ол туралы Жолдауда «Стратегия – күннен-күнге, жылдан-жылға елімізді, қазақстандықтардың өмірін жарқын ете түсетін нақты практикалық істер бағдар­­ламасы» деп атап көрсетілген. Мемлекет басшысының ал­дымызға қойып отырған еліміз­дің әлемдегі ең дамыған 30 елдің қатарына кіру жөніндегі жос­пары да осы халқымыздың өмір сапасын жақсарту мақ­сатындағы көкейкесті ойлардан туған. Жолдауда атап көрсетілгеніндей, осы биік межеге жету үшін Елбасы ел Үкіметінің алдына нақты тұжырымдама жобасын жасау жөнінде міндет қойды.

– Жолдауда азаматтық қыз­­­­мет­ші­лердің еңбекақысын тағайындаудың жаңа үлгісін әзірлеу мәселесі күн тәр­ті­­­біне қойылды. Бұл шын мәнін­де әлеуметтік сала қызмет­­­кер­­­­ле­­­­рінің жалақысын елеулі түрде көтеруге жол ашады емес пе?

– Осы уақытқа дейін мұға­лімдердің, дәрігерлердің және әлеуметтік сала қыз­мет­керлерінің жалақысын бел­гілеу мәселесінде түсініксіз жағдайлардың орын алып келгендігі жасырын емес. Биылғы Жолдау бойынша 2015 жылғы 1 шілдеден бастап, елімізде азаматтық қызметшілердің еңбекақысын белгілеудің жаңа үлгісі енгі­зілетін болды. Яғни, 2015 жылдың 1 шілдесінен денсау­лық сақтау саласы қызмет­кер­лерінің еңбекақысы 28 пайызға дейін, білім беру саласы қыз­меткерлерінің еңбекақысы 29 пайызға дейін, Әлеуметтік қорғау саласы қызметкерлерінің жалақысы 40 пайызға дейін өсірілетін азаматтық қыз­­мет­шілер еңбегіне ақы төлеудің жаңа моделі енгізіледі. Бұл көпшіліктің көңілінен шығатын, көптен күткен игі қадам болмақ.

Сонымен бірге, бұл Жол­дауда мүмкін­­­дігі шектеулі азаматтардың тұрмыс жағдайын көтеруге байланысты кешенді міндеттерді шешу мәселесі көтерілді. Нұрсұлтан Назарбаев Жолдауда «...мүмкіндігі шектеулі азаматтарымызға көбірек көңіл бөлу керек. Олар үшін Қазақстан кедер­гі­сіз аймаққа айналуы тиіс», – деп атап көрсетті. Ендігі уақыт­та мүмкіндігі шектеулі адам­дарға тұрмыстық қызмет көрсету, тағам өнер­кәсібі, ауыл шаруашылығы кәсіп­­­орындарында жұмысқа орналасу үшін барлық мүмкіндіктер жасалатын болады. Елбасы барлық кәсіпкерлер мен биз­несмендерді мүмкіндігі шектеулі аза­маттарға қамқорлық көрсетуге шақырды.

– Жолдауда еліміздің ұлттық идеясының тұғы­рына айналатын «Мәңгілік Ел» Патриоттық актісін әзір­леп, қабылдау мәселесі атап көрсетілді. «Мәңгілік Ел» ұлттық идеясы төңірегіндегі ойыңыз қандай?

– Шындығында да көпші­лік арасында еліміздің ұлттық идеясы туралы әртүрлі пікір­лер үнемі айтылып келеді. Тұңғыш Президентіміз өзінің парасаттылығы мен даналығын осы жолы тағы бір айқын паш етті. Ол кейбіреулер әр саққа жүгіртіп, әңгіме туындатып жүрген ұлттық идеямыздың тұғырын бұлжытпай айқын­дап берді. Ата-бабамыз арман­даған Тәуелсіздігімізді баян­ды етіп, елімізді өркениет биігіндегі елдердің алдыңғы қатардағы шоғырынан көретін болсақ, ұлттық идеямыздың орындалғаны емес пе. Мәңгілік Ел болудан артық қандай мақсат, қандай арман болуға тиіс. Мемлекет басшысы бар­лық қазақстандықтарды бір мақсатқа жұмылдыратын ұлт­тық идеяның жеті тұғырын бел­гілеп берді. Ендігі міндет – осы жеті кешенді міндетті іс жүзіне асыру мақсатында жұмыла еңбек етіп, бірлігімізді берік, берекемізді баянды ете беру баршамыздың басты парызымыз болмақ.

Әңгімелескен

Жылқыбай ЖАҒЫПАРҰЛЫ,

«Егемен Қазақстан».