Тазалықты баладан үйренейік

«Алматы Ақшамы» газеті

26 мамыр 2012 жыл.

Рая ЕСКЕНДІР

Білімнің қара шаңырағы, Қазақстанның Еңбек Ері Аягүл Миразова басшылық ететін Ы.Алтынсарин атындағы №159 гимназияда өткен «Соңғы қоңырау» салтанаты мектеп оқушысын ғана емес, олардың ата-аналарын да үлкен қуанышқа бөледі. Биылғы жыл мектеп тарихы үшін тағы да бір елеулі жыл болды. Қара шаңырақ өткен жылы ғана еліміз Тәуелсіздігімен қоса өзінің 20 жылдығын атап өтсе, міне, енді мектептің 21-і түлектерін өмір атты ақ айдынның кемесіне мінгізіп, қол бұлғағалы тұр.

Мектеп басшысы халқымыздың танымал қыздарының бірі, мемлекет және қоғам қайраткері Аягүл Миразова барша қауымды осынау шаттыққа толы мерекемен құттықтап, балдәурен шақтың жастық шақ атты алтын кезеңіне бет алған мектеп бітіруші түлектерге ақ жол тілеп, қашанда еліміздің мақтанышы болып, биіктерден көрінулеріне тілектестігін білдірді.

Осы тұста мектеп басшысының 2011-2012 оқу жылының сыныптан сыныпқа көшу және мектеп бітірушілерге арналған бұйрығы оқылды. Осыдан соң биылғы жылдың мектеп бітіргелі тұрған түлектері ортаға шығып, көптің құрметіне ие болды. Олардың қатарында «Алтын белгі» иегерлері, Халықаралық және республикалық ғылыми жоба жеңімпаздары, қалалық, аудандық олимпиада жеңімпаздары, «Кенгуру абота» олимпиадаларының жүлдегерлері, өнер, спорт сайыстарының жеңімпаздары, әрине, шаһар басшысы Ахметжан Есімовтің арнайы «Үркер» төсбелгісінің иегері ортадан орын алды.

Еліміздің ертеңгі тізгін ұстар болашақтарына деген зор сенімін білдірген КСРО-ның Халық әртісі, ҚР Мемлекеттік сыйлығының лауреаты, сахна тарланы Асанәлі Әшімұлы: «Тазалықты біз баладан, адалдықты иттен үйренуіміз керек. Өмір – сахна дейміз, адамның бәрі әртіс болып, рөл ойнай алады. Ал, образға ену екінің біріне бұйыра бермейді. Сондықтан біз тазалықты осы періштелерден үйренуіміз керек. Көп жағдайда балаларға қарап үлгі алуымыз керек. 

Мен өзім ауруханада жатсам да, Аягүл Төреқызын сыйлап, арнайы осы кешке келіп отырмын. Тіпті, көңілім көтеріліп, ән салғым келіп тұр, – деп ағынан жарылған Алаштың Асанәлісі, – Бүгінгі күн мен үшін тарихи оқиға. Оны күнделігіме міндетті түрде түсіремін. Сіздер әлі-ақ «Алматы ақшамы» газетінен осы оқиғаны оқып, еске түсіретін боласыздар», дей келе, барша мектеп ұжымын табысты оқу жылымен құттықтап, ақ батасын берді. Халық қалаулысы, мектептің ата-анасы, ҚР Парламенті Мәжілісінің депутаты Нұртай Сабильянов биылғы жылғы мектеп бітіргелі тұрған түлектерге зор сенім білдірді.

– Елбасы еліміздің болашағы жастардың қолында деп үнемі сіздерге зор сенім білдіріп, үміт күтеді. Елімізде сіздердің оқып білім алуларыңыз үшін барлық жағдай жасалып жатыр. Күн санап емес, сағат сайын гүлденіп, өркенін жайып өсіп келе жатқан Астанаға келіп білім алыңдар. Мен үшін бүгін аса қуанышты күн. Үлкен балам Әкежан осы мектепті өте тамаша көрсеткішпен аяқтағалы тұр. Ол – ұстаздар, сіздердің еңбектеріңіз.

Осы мектепті республикамыздағы ең таңдаулы мектеп мәртебесіне көтерген білікті басшы – Аягүл Төреқызы, сіздің еңбегіңіз, сізге зор рахмет! Балаларымыздың алғашқы ұстазы болған, «Жыл мұғалімі», мектептің айтулы ұстазы Гүлзина Үржігітова мен 11-сынып жетекшісі Сәуле Ильясқызы сіздердің ерен еңбектеріңізді де біз әрқашан құрметпен еске алатын боламыз, – деген Нұртай Салихұлы ҚР Парламенті Мәжілісінің депутаты Гүлмира Есімбаеваның құттықтауын жеткізді. Бұл күні салтанатты мерекеге ата-аналар, халқымыздың танымал өнер шеберлері – Меңтай Өтепберенов, Мақпал Жүнісова қатысты.

«Соңғы қоңырау» соғу құрметіне мектеп мақтаныштары, «Алтын белгі» үміткерлері – Әкежан Салих, оқу озаттары – Балжан Мұқашева, Азамат Қазақбаев, Еңлік Мұратқызы, Динара Ерхатова және 1-сыныптың үздік оқушылары – Сара Салих, Мейірлан Аманбек, Ақбота Әліқұл, Айдар Кәкімов, Мадияр Қалдыбай ие болды.