Мәжілісте Міндетті әлеуметтік медициналық сақтандыру жүйесінің проблемалары мен даму перспективаларына арналған Үкіметтік сағат өтті. Ағымдағы жағдай туралы депутаттарға денсаулық сақтау министрі Ажар Ғиният баяндады. Үкімет сағатына дайындық аясында әлеуметтік-мәдени даму комитетінің депутаттары халыққа медициналық қызмет көрсету жүйесіндегі проблемаларды егжей-тегжейлі зерттеді. Мәжілісмендер Астана және Алматы қалаларының, Алматы, Қарағанды және Жамбыл облыстарының бірқатар медициналық ұйымдарында болып, мемлекеттік және жеке медициналық ұйымдардың өкілдерімен сараптамалық кездесу өткізді, сондай-ақ азаматтардың өтініштерін талдады. Талдау көрсеткендей, АМС жүйесінде барлық аймақтарға ұқсас бірқатар проблемалар жинақталған, бұл жалпы денсаулық сақтау жүйесіндегі кемшіліктерді көрсетеді.