МӘЖІЛІС МҮГЕДЕКТЕРДІҢ ҚОҒАМ ӨМІРІНЕ ТОЛЫҚТАЙ ҚАТЫСУЫН ҚАМТАМАСЫЗ ЕТУГЕ БАҒЫТТАЛҒАН КОНВЕНЦИЯНЫ МАҚҰЛДАДЫ

Астана. 21-қаңтар. Мәжіліс үйі. Бүгін Палата Спикері Қабиболла Жақыповтың төрағалығымен Мәжілістің жалпы отырысы өтті.

Халық қалаулылары «Мүгедектердің құқықтары туралы конвенцияны ратификациялау туралы» заң жобасын мақұлдады. Бүгінгі күні бұл конвенцияны 151 мемлекет ратификациялаған. Конвенция мүгедектердің құқын қорғауға және іске асырылуын көтермелеуге, мүгедектігіне байланысты кемсітушілікті жоюға, мүгедектердің қоғам өміріне толықтай қатысуын қамтамасыз етуге бағытталған.

Сондай-ақ осы күні Палата Палата сақтандыру және исламдық қаржыландыру мәселелері бойынша заңнамалық жаңа енгізілімдерді екінші оқылымда мақұлдады.     

Заң жобасының мақсаты – исламдық сақтандыруды енгізу, ислам банктерінің қызметіне қолайлы жағдайлар жасау, сақтандыру төлемдеріне кепілдік беру жүйесінің тұрақтылығын және қаржылық орнықтылығын қамтамасыз ету, қызметкерді еңбек мідеттерін орындауы кезінде жазатайым оқиғалардан міндетті сақтандыру жүйесін жетілдіру арқылы Қазақстанда толыққанды исламдық қаржы жүйесін құру болып табылады.

Жалпы отырыста мәжілісмендердің қолдауына ие болған тағы бір заң жобасы Қазақстан мен Мажарстан мемлекеттерінің аумағында заңсыз тұратын адамдардың реадмиссиясы  туралы үкіметаралық келісімді ратификациялау.

Құжат тараптар мемлекеттерінің аумағында заңсыз жүрген адамдардың реадмиссиясы мен транзитін өзара жеңілдету, сәйкестендіру үшін жылдам әрі тиімді рәсімдерді, сондай-ақ, енді тараптар мемлекеттерінің аумақтарына келу және оларда болу шарттарын орындамайтын адамдарды қауіпсіз түрде және тәртіппен қайтаруды орнатуға бағытталған.                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                           

Осы күні Мәжіліс депутаттары бірқатар жаңа заң жобалары бойынша қорытынды әзірлеу мерзімін анықтады. Олардың қатарында кәсіпкерлік пен азаматтық процестік туралы кодекстер, сондай-ақ, өзін-өзі реттеу, бағалы металдар мен асыл тастар, ауыл шаруашылығы кооперациясы, мемлекеттік-жекешелік әріптестік туралы заң жобалары бар.

Сонымен қатар, жалпы отырыста мемлекеттік сатып алу,   экологиялық мәселелер бойынша түзетулер енгізуге қатысты және реадмиссия туралы қазақстандық-белорустық үкіметаралық келісімді ратификациялау бойынша қорытынды әзірлеу мерзімі тағайындалды.     

(Зәмеш Кеңесқызы – 74-63-02 ҚР Парламенті Мәжілісі Аппаратының Баспасөз қызметі)