29 қаңтар, Мәжіліс Үйі. Мәжіліске Алжир Республикасының Қазақстандағы Төтенше және Өкілетті Елшісі Камал Фениш келді. Кездесуге Халықаралық істер, қорғаныс және қауіпсіздік комитетінің төрағасы Айгүл Құспан және Алжирмен достық тобының жетекшісі Бақтықожа Ізмұхамбетов бастаған депутаттар қатысты. Бақтықожа Ізмұхамбетов Алжир Қазақстанның Африка мен ислам әлеміндегі негізгі серіктестерінің бірі екенін атап өтті. Екі ел арасындағы ынтымақтастықтың әлеуеті зор. – Біз екіжақты қатынастар аясында парламентаралық байланыстарымызға үлкен мән береміз. Сіздерді достық топтары деңгейінде ынтымақтастықты одан әрі тереңдетуге шақырамын. Бұл екі тарапқа да заңнама саласында мол тәжірибе алмасуға және халықтарымыз арасындағы достықты нығайтуға мүмкіндік береді деп санаймын, – деді Бақтықожа Ізмұхамбетов. Елші Камал Фениш Алжир мен Қазақстанның позициялары, мемлекеттердің алаңдары, минералды ресурстары және көптеген байланыс нүктелері ұқсас екенін айтты. Сонымен қатар, Қазақстан Алжирдің тәуелсіздігін алғашқылардың бірі болып мойындады. - Қазақстан Президенті жүргізіп жатқан саяси реформалар үшін алғысымды білдіремін. Олардың ішіндегі ең маңыздысы-Конституциялық Кеңесті Конституциялық сотқа айналдыру. Бұл әділеттілікті орнатуда үлкен рөл атқарады. Осыған ұқсас реформа біздің елімізде де жүргізілді. Конституциялық Соттың өкілеттіктері анағұрлым кең болғандықтан, ол саяси шешімдерге араласуы мүмкін. Мен Қазақстан Конституциясымен таныстым, ол маған үлкен әсер қалдырды, – деп атап өтті Камал Фениш. Кездесу барысында депутаттар Алжирдің заңнамалық, құқықтық жүйелеріне және басқаларына қатысты сұрақтарға жауап алды. Мәжілісмендер алжирлік әріптестерімен ынтымақтасуға ниет білдірді. Өз кезегінде Айгүл Құспан Алжир Елшісіне сапары үшін алғысын білдірді.