«Ауыл халқының тұрғын үй жағдайларын жақсарту бойынша «Отбасы банк» қызметі туралы» Аграрлық мәселелер комитетінің тақырыптық отырысы өтті.

 «Отбасы банкі» қызметін қайта қарау, оның бағытын облыс орталықтарынан аудандарға, моноқалаларға, ауылдарға қайта бағдарлау қажеттілігі туралы Мемлекет басшысының тапсырмасын іске асыру жөніндегі уәкілетті органдар мен ұйымдардың жоспарлары талқыланды.

Осыған байланысты отырысқа өнеркәсіп және құрылыс, қаржы, ауыл шаруашылығы және ұлттық экономика министрліктерінің, сондай-ақ «Отбасы банк» Тұрғын үй құрылыс жинақ банкі АҚ, «Бәйтерек» ҰБХ» АҚ, «Атамекен» Ұлттық Кәсіпкерлер палатасының, Президент жанындағы Әйелдер істері және демографиялық саясат жөніндегі ұлттық комиссияның өкілдері, салалық қауымдастықтар мен ауыл шаруашылығы тауарын өндірушілер шақырылды.

Өнеркәсіп және құрылыс министрлігінің және «Отбасы банк» АҚ басшылары моноқалаларда, аудандарда және ауылдық жерлерде үйлер мен шағын пәтерлі тұрғын үйлер құрылысын несиелеу жөніндегі бағдарламаның тұжырымдамасын ұсынды. Сонымен қатар, «Дипломмен - ауылға» бағдарламасы талқыланды, оны ағымдағы жылдан бастап «Отбасы банк» АҚ жүзеге асырумен айналысады. Қатысушылар ауылдық жерлерде тұрғын үйді жаңғырту және салу мәселелерін жүйелі түрде шешу үшін өз ұсыныстарын білдірді.

Сонымен қатар, ауыл шаруашылығы құрылымдарының басшылары отырысқа қатысушыларды кәсіпорын қызметкерлері мен әлеуметтік қызметкерлер үшін ауылда тұрғын үй салу жөніндегі жобаларды іске асыру тәжірибесімен таныстырды.

Отырыс қорытындысы бойынша Комитет уәкілетті органдардың атына ауылдық жерлерде тұрғын үй құрылысына кредит беру бағдарламасын жетілдіру жөнінде тиісті ұсынымдар жіберетін болады.