АЙҚЫН МІНДЕТ, НАҚТЫ ІС САРАЛАНДЫ

10 Сәуір 2012 жыл. «Атырау» газеті

Ақкиізтоғай селолық округіндегі Аманкелді орта мектебінде Қазақстан Республикасының Парламент Мәжілісі депутаты Е.Шпановтың село жұртшылығымен кездесуі  «Әлеуметтік-экономикалық жаңғырту — Қазақстан дамуының басты бағыты» тақырыбындағы ҚР Президенті-Ұлт Көшбасшысының Қазақстан халқына Жолдауын талқылауға арналды.

Тұрғындар алдында Мәжіліс депутаты Е.М.Шпанов сөз сөйлеп, Жолдауда қамтылған мәселелерге нақты тоқталды, он бағыт бойынша міндеттер кешенін жүзеге асыру, қолжетімді баспана, электрондық жүйе, өңірлерді дамыту бойынша да өз ойларын ортаға салды.

Село тұрғындары биыл қыстың райы қатты болғанын, жол қатынасының қиындық тудырғанын айтып, «Ақбұлақ» бағдарламасының селода тиімді жүзеге асуына, су құбырын әр үйге уақытында тартып беруге ықпал етуін сұрады.

Кездесуде село тұрғындары Т.Мусиев, А.Ершуов сөйлеп, көліктерді техникалық байқаудан өткізуді орталықтандыруда қиындық туындағанын, жолды жөндеп, қалыпқа келтіруге жәрдем беруін сұрады.

Депутат қолдан келгенше қолұшын созатынына уәде берді.

* * *

ҚР Парламенті Мәжілісі депутаты Е.М.Шпановтың жұртшылықпен осындай кездесуі, сонымен қатар, Жаңа Қаратон поселкесіндегі №22 орта мектептің акт залында да өтіп, Президенттің Қазақстан халқына Жолдауы қызу талқыға түсті. Депутат Жолдаудағы он бағыт бойынша міндеттер кешенін жүзеге асыруға кең тоқталды, шағын қаланы дамыту мәселесінің маңыздылығына мән берді.

Бұдан кейін село тұрғындарына сөз беріліп, Ардагерлер кеңесінің төрағасы О.Молдашев жастарды Теңіз кен алаңына, басқа да компанияларға жұмысқа тартса, 7500 халқы бар кентке аурухана қажеттігіне, жол, балабақша мәселесінің шешілуіне ықпал етулерін сұрады.

Зейнеткерлер А.Рзиев су, газ, азық-түлік, дәрі-дәрмек бағаларының өсуіне жол берілмесе екен десе, Ү.Әтенов үй араларына тротуар салу, көшені жарықтандыруды, малға, талға техникалық су жеткізіп тұрса деген тілектерін білдірді, М.Байжанов поселкені көріктендіру мәселесін қозғады.

Кездесуді Жаңа Қаратон поселкесі әкімі Р.Молдабаева қорытындылап, биыл екі балабақша, ашық спорт алаңы, 4 шағын аяқдоп алаңы салынатынын айтты.

Қаржау Оразбаев,

өз тілшіміз.

Жылыой ауданы.