Депутаттық сауал

Құрметті Әлихан Асханұлы!

Еліміздегі туристік саланың жүйелі дамып, оның экономикалық оң әсерін күткелі біраз жылдың жүзі болды. Әрдайым Қазақстандағы туризмнің тұрақты дамуына кедергі келтіретін мәселелер мен қиындықтар таусылар емес.  Мысалы, турист болса – маршрут жоқ, маршрут бар да – инфрақұрылым жоқ, инфрақұрылым болса – ұсынатын өнім жоқ. Біреуі болса, біреуі жоқ, шамасы бұл салада жүйелі жұмыс жоқ.

Алайда, пандемия аяқталып, ішкітуризмге қызығатын да, төлем мүмкіндігі бар туристердің саны артқанын байқап келеміз. Бұл сала үшін аталған жағдайды «сәтті туристік уақыт» деп айтуға келеді. Бірақ, адам қалағанымен транспорттық жүйесі реттелмегеннің салдарынан, еліміздің барлық табиғи сұлулығына жету мүмкін емес болып шықты.

Оның ішінде, әуе жолдарымен саяхаттау сапарлары бойынша ең көп шағымдар келіп түсуде. Ұшу жиілігінің төмендігі, реттеуге келмейтін түсініксіз әуе билеттерінің баға мәселесі, қызмет көрсету сапасы мен рейстерді негізсіз кешіктіру сияқты мәселелерді тізіп кете беруге болады. Оған қоса, әуекомпанияларымен турпакеттер бойынша келіссөздер жүргізу мүмкін емесдігін турагенттіктер жиі көтереді. Бұл бір.

Енді, теміржолдың жыры тағы бар. Қазақстан теміржолының туризмдік бағыттарды дамытуға қауқары да, ниеті де жоқ сияқты көрінеді. Бұл компания елдегі монополист бола тұра, өзінің басты бағытын жүк тасымалдауға арнаған. Ал, халық қолданатын вагондардың сапасы нашар, интермодальды тасымалдау тәжірибесі жоқ, туристік кластағы пойыздар туралы айтпай-ақ қоялық.

Еуропаны айтпағанда, Орталық Азия және өзге жекелеген мемлекеттермен байланыстыратын халықаралық туристік жүйені қалыптастыра алмадық. Осы шикіліктін есебінен, Жібек жолы бойындағы теміржол маршруттарының орнын көршілес Өзбекстан өз стиліндегі жайлы вагондарымен туристік кластер ретінде іске асырып отыр. Мұны екі деңіз.

Үшіншіден, автокөлікпен жүретін жолдардың жағдайы сын көтермейтіні туралы депутаттық сауалдардың санында есеп жоқ. Тіпті Мемлекет басшының өзі бұл мәселені шешетін уақыт жетті деп Үкіметті сүйрелеп жүргенін білеміз. Бір ғана мысал, еліміз бойынша ең кемінде 4 мың шақырымнан асатын 166 бағыт бойынша автомобиль жолдарын жөндеу мен реконструкциялау қажеттілігі анықталуда.

Ал жыл басында депутаттардың табанды қолдауымен туристік саланы дамытуға оң әсерін беретін бірнеше жаңа ұсыныстар енгізілген еді. Бірақ, бұл мәселеде де бюрократиялық шырмаулар көбейіп, «Kids go free» бағдарламасымен он айдың қорытындысы бойынша небәрі тек 1200 бала ғана әуе сапарларын тегін пайдалана алған, жоспар бойынша кемінде 100 мың баланы қамтимыз деп еді. Баланың ұшу билеті қайтарылады дегеніміз қайда сонда?!

Құрметті әріптестер, туризм саласын дамыту бойынша айтарымыз көп, ұсыныста жетеді. Осыған байланысты, «AMANAT» фракциясының бүгінгі жолданған депутаттық сауалына 2022 жылдың 19 қазан күні осы салаға жетекшілік ететін Үкімет мүшелері мен қажетті мемлекеттік органдардың қатысуымен мәселені Парламент Мәжілісінің Пленарлық отырысында жан-жақты, ашық талқылауды және жауапты ауызша беруді ұсынамыз.

Құрметпен,

«AMANAT»  партиясының

Фракция мүшелері, депутаттар                                        Е. Бейсенбаев

                                                                                                Ә. Әбсеметова

                                                                                                З. Камасова

                                                                                                Г. Нұрымова                      

                                                                                                В. Ким

                                                                                                Л. Павловец

                                                                                                Ж. Сүлейменова

                                                                                                Л. Рамазанова

                                                                                                С. Ақышев

                                                                                                Е. Абақанов

                                                                                                Ә. Сапарова

Парламент Мәжілісіне                                                         І. Бұларов

Қазақстан халқы Ассамблеясынан                                  А. Амирхан

сайланған депутаттар                                                         В. Набиев

«Қазақстан Халық партиясы»

Фракция мүшеcі, депутат                                                   И. Смирнова