2022 жылғы 12 қазанда жарияланды
Қазақстан Республикасы
Премьер-Министрінің
бірінші орынбасары
Р.В. Склярға
Депутаттық сауал
Құрметті Роман Васильевич!
Мемлекет басшысы 2022 жылғы 14 шілдеде өткен Үкіметтің кеңейтілген отырысында жол құрылысы саласын реформалау және 1 қыркүйектегі Жолдауында 2025 жылға дейін жергілікті жолдардың кемінде 95 пайызын жақсарту туралы тапсырма берген болатын.
Қазіргі таңда Атырау-Астрахань, Ақтөбе-Қандағаш, Қарағанды-Балхаш, Талдықорған-Қалбатау-Өскемен, сол сияқты басқа да көптеген жобалар Үкімет және мемлекеттік органдар тарапынан уақытында шешімін таппай, бюрократияға жол беріп жұмсалған қаржылар жерге көміліп, жұмыстар аяқталмауда.
Мердігер компаниялардың айтуынша:
- жүк тасымалдағыш вагондардың жетіспеушілігі;
- битум сияқты құрылыс материалдарының тапшылығы;
- қаражат, қымбатшылық және инфляция;
- Үкімет пен мемлекеттік органдар бірнеше рет өткізген кеңестерінен оң нәтиженің шықпауы.
Мердігер компаниялардың уәждерін дүрыс деп есептейміз. Бұл Үкімет айналысатын мәселе.
Сапасыз салынған жолдардың жағдайы біздегі коррупциямен салғырттықтың және талапсыздықтың салдарынан болып отыр.
2022 жылдың 8 айында республика жолдарында 9 430 жол-көлік оқиғасы тіркелген, оның нәтижесінде 1 480 адам қаза тауып, 12 400 адам жарақат алған. Бұл көрсеткіш жылдан жылға өсуде.
Жол-көлік оқиғаларынан қаза тапқандар саны Қарағанды, Маңғыстау және Қызылорда облыстарында басқа өңірлермен салыстырғанда өте жоғары.
Мәселен, «Батыс Еуропа - Батыс Қытай» автомобиль дәлізінің жалпы ұзындығы 2 787 шақырымды құрайды. Осы жол бойынша Қызылорда қаласы - Ақтөбе облысы бағытындағы жүк көліктерінің қарқындылығы жыл сайын орташа есеппен 10%-ға дейін өсіп, тәулігіне 10 мың автокөлікке жетіп отыр. Ағымдағы жылдың 8 айында аталған дәлізде 317 жол-көлік оқиғасынан 147 адам қаза тауып, 560 адам жарақат алған. Қаражат тапшылығынан және аралық жөндеу мерзімдері сақталмағандықтан осындай жағдай орын алып отыр.
Сондай-ақ, Түркістан облысы бағытына қарай 246 жол шақырымы I-ші техникалық санатқа жатқызылған, ал Ақтөбе облысы бағытына қарай 566 жол шақырымы екі жолақты болып бекітіліп, II-ші техникалық санатқа жатқызылған. Бір жол, бір жоба не себептен екі категорияға бөлінгені түсініксіз.
Ақтөбе бағытындағы жолдың тарлығына орай жол-көлік оқиғасының саны өсіп, адам және материалдық шығындар жылдан жылға артуда.
Ағымдағы жылғы сегіз айының өзінде 48 жол-көлік оқиғасы тіркеліп, 40 адам қаза тауып, 67 адам жарақат алып отыр.
Осының бәрі жол белгілері мен қоршаулардың, жануарларға арналған тосқауылдардың, жол бойындағы камералардың жетіспеушілігі және автомобиль жолдарында көліктік-пайдалану жүктемесін дұрыс ескермей, сәйкес техникалық санатқа жатқызылмауының салдары.
Қазіргі таңда, елімізде автомобиль жолдарының инфрақұрылымын талапқа сәйкестендіру үшін жер үсті және жер асты өткелдері мен көпірлерден бөлек, 1 000 000 км астам жолға жол таңбалары, 25 000 жол белгілері, 13 000-ға жуық сигнал бағаналары, 514 бағдаршам, 5000 км жолға жарықтандыру және т.б. реттеу құралдары қажет.
Осы көрсетілген мәселелерге байланысты:
- Мемлекет басшысының берілген тапсырмалары қашан іске асырылмақ?
- Жүк вагондары мәселесі, битум тапшылығы және жоба құнының түзету мәселелері қашан шешілмек?
- Автомобиль жолдарының инфрақұрылымы қашан талапқа сәйкестендірілмек?
- Сіздің тікелей бақылауыңыздағы жол-көлік құрылыс жұмыстарының осындай жағдайға жетуіне және Президент тапсырмаларының орындалмауына не себеп?
Нәтижесі туралы ақпаратты «Қазақстан Республикасының Парламенті және оның депутаттарының мәртебесі туралы» Конституциялық заңның 27-бабына сәйкес жолдауыңызды сұраймыз.
Құрметпен Мәжіліс депутаттары,
«AMANAT» партиясы
фракциясының мүшелері С. Мусабаев
Б. Кесебаева
Е. Жаңбыршин
орынд.: Ф. Баженеева
тел.: 74-64-53