Заң жобаларын Мәжіліс депутаттарына Сыбайлас жемқорлыққа қарсы іс-қимыл агенттігі төрағасының бірінші орынбасары Ұлан Сарқұлов ұсынды. Ол түзетулердің басым бөлігі сыбайлас жемқорлыққа қарсы саясат тұжырымдамасын іске асыруға бағытталғанын хабарлады. Негізгі заң жобасында өзгерістер мен толықтырулар үш кодекске және бес заңға, ілеспе түзетулер – әкімшілік құқық бұзушылық туралы Кодекске енгізіледі. Баяндамашының ақпараты бойынша, түзетулермен ауыр және аса ауыр қылмыстар жасаған сыбайлас жемқорлардың жария тізілімі енгізіледі, бұл қоғамда қоғамдық айыптау арқылы сыбайлас жемқорлыққа төзбеушілікті қалыптастыруға тиіс. Тағы бір жаңалық – мемлекеттік қызметтегі және квазимемлекеттік сектордағы мүдделер қақтығысын анықтау мен шешуді реттеу. Сонымен қатар, жеке мүдделерін декларациялау, сондай-ақ пара ұсынғаны және уәде еткені үшін қылмыстық жауапкершілік енгізіледі. – Қылмыстық кодексті жаңа 366-1 («Пара алуға келісім беру, пара сұрау немесе талап ету»), 367-1 («Пара ұсыну және уәде ету») баптарымен толықтыру ұсынылады. Пара алу туралы келісімді аяқталған қылмыс деп тану айқын профилактикалық нәтиже береді, бұл мемлекетке зиян келтірмес бұрын пара алуды тоқтатуға мүмкіндік береді, деп түсіндірді Ұлан Сарқұлов. Мемлекет басшысының күнделікті сыбайлас жемқорлықты жою жөніндегі тапсырмаларын іске асыру шеңберінде заң жобаларында мемлекеттік орган, мемлекеттік және мемлекеттік емес ұйым қызметкерінің заңсыз сыйақы алумен байланысты қылмыстарды анықтау жөніндегі жұмыс жетілдіріледі. Сыбайлас жемқорлыққа қарсы шараларды қабылдамағаны үшін жауапкершіліктің құқықтық тетіктері де жетілдірілуде. Сонымен қатар, сыбайлас жемқорлық құқық бұзушылық жасағаны үшін заңды тұлғалардың жауапкершілігі күшейтіледі. Депутаттар баяндамашыға түсіндірме сұрақтарын қойып, заң жобаларын жетілдіру бойынша өз ұсыныстарын білдірді. Түзетулерді бірінші оқылымға дайындау бойынша одан әрі талқылау Мәжіліс депутаты Айдос Сарым бастаған жұмыс тобының отырыстарында өтеді.