2016 ж. 05.10. жарияланды.                                                                                                                                                        Қазақстан Республикасының

Премьер-Министрі

Б.Ә. Сағынтаевқа

Депутаттық сауал

Құрметті Бақытжан Әбдірұлы!

         Парламент Мәжілісінің депутаттары өңірлерде сайлаушылармен кездесу өткізгенде, елді-мекендерді ауыз сумен жабдықтау мәселесіне байланысты көптеген сұрақтар  туындады.

Уәкілетті органдардың мәліметтері бойынша, республикада ауылдық елді мекендердің 51 пайызы, ал қалалардың 87 пайызы сумен жабдықталған.

         Ал, ауылдық елді-мекендердің Павлодар облысында - 20,5%, Қостанай облысында – 28%, Батыс Қазақстан облысында – 37%, Ақтөбе облысында – 41%, Шығыс Қазақстан облысында – 41,5% ғана ауыз сумен жабдықталған..

Сумен жабдықтау бойынша дайын жобаларға республикалық бюджеттен қаражат уақытында бөлінбегендіктен де, жобалау-сметалық құжаттамалардың қолдану мерзімдері өтіп кетеді.  Жобаларды жаңадан дайындауға, мемлекеттік сараптама жасауға қосымша қаражат және уақыт қажет болады. Бұл ауыз сумен жабдықтау мәселесін шешуді қиындатады.

         Сонымен бірге, елді-мекендер шегінен тыс жерлерде сумен жабдықтау және су бұру саласында жергілікті атқарушы органдарды үйлестірумен оларға әдістемелік басшылық жасау және жобалау, iзденiс, ғылыми-зерттеу және конструкторлық жұмыстарды ұйымдастыру Қазақстан Республикасы Ауылшаруашылық министрлігінің құзыретінде болса, ал елді-мекендер шегіндегі осындай құзырет Қазақстан Республикасы Ұлттық экономика министрлігінде.

2017 жылға арналған республикалық бюджеттің жобасында ауылдық елді мекендерді сумен жабдықтауға 19,9 млрд. теңге және қалаларды сумен жабдықтауға 8,8 млрд.теңге қарастырылған. Бірақ, бұл қаражат жеткіліксіз, өйткені қазіргі уақытта қаржыландыру үшін сомасы 100,0 млрд. теңгеден асатын сумен жабдықтау жобалары бар.

Бұған қоса, төлеу қабілеттілігінің төмендігінен ауылдық елді-мекендер сумен жабдықтауға қарастырылған мемлекеттік несиелерді ала алмайды.

Жоғарыда айтылғандарға байланысты:

1. Ауылдық елді-мекендерді сумен жабдықтау жобаларын қаржыландыруға қосымша бюджет қаражатын бөлу;

2. Сумен жабдықтау мәселелерін бір министрліктің құзыретіне беру;

3. Тұрғындар саны аз ауылдық елді-мекендерді сумен жабдықтау тетігін оңайлату мәселелерін қарастыруды сұраймыз.

Депутаттық сауалға заңмен белгіленген мерзімде жазбаша түрде жауап беруді сұраймыз.

                           Құрметпен,

    депутаттар, «Нұр Отан» партиясы

            Фракциясының мүшелері                                                                                      Н. Сабильянов

                                                                                                                                                    С. Ахметов

                                                                                                                                                    С. Дьяченко

                                                                                                                                                    Б. Жылқышиев

                                                                                                                                                    А. Қожахметов

                                                                                                                                                    Ш. Өтемісов

                                                                                                                                                    М. Пішембаев