2024 жылдың 14 ақпанында жарияланды                                                                                                                                                                                                                       Қазақстан Республикасы

                                                                                                                                                                                                                                                                                  Премьер-министрінің орынбасары

                                                                                                                                                                                                                                                                                                    С.М.Жұманғаринге

Депутаттық сауал

Құрметті Серік Мақашұлы!

«AMANAT» партиясы фракциясының депутаттарының атына мал шаруашылығындағы соңғы кезде ауа райының салдарынан туындап отырған қиын жағдайға байланысты өтініштер түсуде.

Қазіргі кезде еліміздің бірнеше облыстарында (Ақмола, Қарағанды, Павлодар) жайылымдарды мұз басуына байланысты табында жүрген жылқы малының өлу оқиғалары орын алып отыр.

Жауын аралас қардан кейін Ақтөбе, Шығыс-Қазақстан, Қостанай, Ұлытау, Солтүстік-Қазақстан облыстарында да қысқы жайылымдардағы жағдай нашарлап кетті.

Былтырғы жылдың қуаңшылығына байланысты көптеген өңірлерде егіндік жерлер ғана емес, шөп оратын жерлерде зиян шекті. Сондықтан бүгінгі күні жем-шөптің мүлдем аздығынан жылқыларды үй маңында ұстау қиын болып тұр.

Қалыптасқан жағдайға байланысты Мәжіліс депутаттары Сізден келесі мәселелерді шешуді сұраймыз:

Біріншіден: Ауа райының экстремалды қолайсыздығы жағдайында қыстау өткізу үшін облыс және аудан көлемдерінде жедел штаб құру. Тез арада шаруашылықтардың жағдайы мен малдың барлық түрлері бойынша шынайы ақпаратты нақтылау керек.

Екіншіден: Қажет болған жағдайда жергілікті аумақ бойынша Төтенше жағдай жариялау.

Үшіншіден: Өңірлердің тұрақтандыру қорларындағы, ал қажет болған жағдайда «Азық-түлік корпорациясының» АҚ-ның жемшөп қорларындағы жем-шөпті де пайдалануды ұйымдастыру.

Төртіншіден: Жем-шөп қоры жеткілікті көлемдегі шаруа қожалықтарынан мал азығын ауылдарға жеткізу мен пайдалануды ұйымдастыру.

Бесіншіден: Жылқыларды қолайлы жайылымдарға, соның ішінде орман қорындағы жайылымдарға ауыстыруды ұйымдастыру.

Алтыншы: Қажет болған жағдайда жайылымдардағы мұз – қар бетін бұзу үшін механикалық өңдеуді ұйымдастыру. Басқа да шараларды жасау.

Мал шаруашылығындағы жүйелі шара ретінде Ауыл шаруашылығы министрлігі жергілікті атқарушы орындармен бірлесіп жайылымдық жерлерді үстірт және түбегейлі жақсартуды кеңінен жүзеге асыруды ескере отырып еліміздің жем-шөп базасын жақсартудың кешенді бағдарламасын даярлауды сұраймыз.

Құрметпен,

«AMANAT» партиясы фракциясының

және Аграрлық мәселелер Комитетінің депутаттары

                                                                          Н.Әшімбетов

                                                                          С.Егізбаев

                                                                          Е.Мәмбетов

                                                                          Қ.Әлішев

                                                                          А.Әлтай

                                                                          Ж.Дайрабаев

                                                                          П.Казанцев

                                                                          Д.Қасқарауов

                                                                          А.Қожаназаров

                                                                          И.Сұңқар

                                                                          Қ.Иса