Мәжіліс депутаттары су тасқынынан зардап шеккен барлық өңірлерде жұмыс істейді. Мәжілісмендер су басқан елді мекендерге барады, жергілікті тұрғындармен кездеседі, гуманитарлық көмек жеткізуді және еріктілердің жұмысын ұйымдастырады, сондай-ақ жедел штабтардың жұмысына қатысады. Мәжіліс депутаттары Паван Сабиров пен Лұқбек Тумашинов су тасқынының алдын алу бойынша жұмыстармен танысу үшін Шығыс Қазақстан облысының Тарбағатай ауданына барды. Өңірдегі жағдай жергілікті әкімдіктің және мәслихат депутаттарының бақылауында. "Ақсуат – Бақей – Қарасу – Ақжар" өңірлік автожолының учаскесі жабылып, тасқын суларды жолдан бұру бойынша шаралар қабылданды. Сондай – ақ, мәжілісмендер Қалбатаудан Боғасқа дейінгі Республикалық маңызы бар "Қалбатау-Майқапшағай" жолының учаскесіндегі жөндеу жұмыстарымен танысты. Жұмыстарға жауапты қытайлық мердігер компанияның өкілдерімен кездесу барысында олар жөндеуді жеделдету мәселелерін талқылады.