Астана, 7 қараша, Мәжіліс үйі. Мәжіліс Төрағасының орынбасары Г. Исимбаева біздің елімізге алғаш рет ресми сапармен келген Сербия Республикасы Халықтық Скупщинасының төрайымы Майя Гойкович ханыммен кездесті.

Жүздесу барысында екіжақты, соның  ішінде парламентаралық қарым-қатынасты одан әрі тереңдетудің өзекті мәселелері талқыланды.

Тараптар дипломатиялық байланыс басталған жылдар ішінде қос мемлекет арасында өзара сенімді және белсенді іс-қимыл орнағанын ерекше атап өтті. Және жеткен жетістіктерді одан әрі еселей түсудің маңыздылығын айтты.

Г. Исимбаева атап өткендей, Қазақстан Президенті Нұрсұлтан Назарбаев пен Сербия Президенті Александр Вучичтің жоғары деңгейдегі кездесулері  екі ел арасындағы саяси ынтымақтастың жарқын көрсеткіші. Мәжіліс Төрағасы орынбасарының айтуынша Қазақстан Сербиямен сауда-экономикалық байланысты одан әрі нығайтуға ынталы. Ол үшін барлық қолайлы жағдайлар жасалған. Сондай-ақ, ауылшаруашылығы, көлік-логистика, фармацевтика және туризм салалары да  басым бағыттар қатарында.

Тараптар халықтар арасындағы татулық жайын сөз ете келіп, этникааралық және дінаралық келісімді қамтамасыз ету әрі реттеу мәселесінде Қазақстан мен Сербияның тәжірибесі мол екеніне тоқталды.

Мәртебелі мейман өз сөзінде Қазақстан басқа елдер мүддесіне қайшы келмейтін халықаралық деңгейдегі бейбіт бастамалардың арқасында БҰҰ Кауіпсіздік Кеңесінің тұрақты емес мүшесі атанғанын және Сирия мәселелерін реттеу бойынша маңызды келіссөз алаңына айналғанын атап өтті.

Кездесу соңында тараптар барлық мүмкіндікті пайдаланып, екіжақты қарым-қатынасты жан-жақты нығайтуға уағдаласты.

 (Зәмеш Кеңесқызы – 74-63-02. ҚР Парламенті Мәжілісі Аппаратының Баспасөз қызметі)