Астана. 7-ақпан. Мәжіліс үйі. Мәжіліс депутаттары, Әлеуметтік-мәдени даму комитетінің төрайымы Гүлнар Иксанова мен Заңнама және сот-құқықтық реформа комитетінің мүшесі Анар Жаилғанова «БҰҰ-Әйелдер» ұйымының Қазақстандағы өкілі  Илейн Конкиевичпен кездесті.

Г. Иксанова Қазақстан мен «БҰҰ-Әйелдер» ұйымы арасындағы ынтымақтастықтың  деңгейін жоғары бағалайтынын атап өтті.

Тараптар гендерлік теңдікті ілгерілету,  әйелдердің мүмкіндіктері мен құқықтарын кеңейту, сондай-ақ, ана мен баланы қорғау, тұрмыстық зорлық-зомбылықтың алдын алу, отбасылық және рухани-адамгершілік құндылықтарды нығайтудың өзекті мәселелерін талқылады.

Кездесу барысында Қазақстан Республикасындағы 2030 жылға дейінгі отбасылық және гендерлік саясат тұжырымдамасы жобасы  төңірегінде жан-жақты әңгіме қозғалды. Аталған тұжырымдаманы әзірлеуге «БҰҰ-Әйелдер» ұйымы да белсене араласты.

Айта кетейік, «БҰҰ-Әйелдер» кеңсесі ағымдағы жылдың 1-қаңтарында Алматыдан Астанаға көшіп келді. Енді осы жерде стратегиялық маңызды жоспарлар одан әрі өз жалғасын табатын болады.

(ҚР Парламенті Мәжілісі Аппаратының Баспасөз қызметі)