Нұр-Сұлтан, 8 қаңтар, Мәжіліс үйі. Бүгін Мәжіліс Төрағасының орынбасары Гүлмира Исимбаева АҚШ Мемлекеттік департаментінің Жаһандық әйелдер мәселесі бойынша Ерекше тапсырмалар жөніндегі Елшісі Келли Экельс Карримен онлайн кездесті.

Мәжілістің вице-спикері атап өткендей, еліміз Тәуелсіздік алған алғашқы күннен бастап әйелдер құқығын нығайту бойынша тұрақты түрде жұмыс жүргізіп келеді.

Қазіргі уақытта Мемлекет Басшысының Жарлығымен бекітілген 2030 жылға дейінгі отбасылық және гендерлік саясат тұжырымдамасы іске асырылуда. Бұдан басқа, 2015 жылы Қазақстан БҰҰ-ның Орнықты даму мақсаттарына қосылып, оның тармақтарының 80 пайыздан астамы республикалық стратегиялық мемлекеттік бағдарламаларға енгізілді.

2018 жылы елімізде «Ауғанстандағы әйелдердің құқықтары мен мүмкіндіктерін кеңейту» атты бірінші өңірлік конференция өтті. Оған Орталық Азия, Ауғанстан, Еуропалық Одақ және АҚШ елдерінің көрнекті өкілдері қатысты. Сонымен қатар Гүлмира Исимбаева америкалық тарапты екінші халықаралық форумды өткізуде аймақтық сипаттағы жобаларды қолдауға шақырды.

Кездесу барысында Қазақстан экономикасындағы әйелдер кәсіпкерлігінің рөлі атап өтілді. Вице-спикердің айтуынша, жұмыспен қамтылған халық арасындағы әйелдердің үлесі 49%-ды құрайды. Бұл ретте әйелдердің Қазақстанның ЖІӨ-не қосқан үлесі шамамен 39%-ды құрайды. Ал, шағын және орта бизнес секторында жеке кәсібі бар әйелдердің үлесі 42%-ды құрады.